Erläbts

Am 11. Apriu isches wider emau Zyt gsi, fürne gmüetlechi Rundi Minigouf ga ds spile. Es isch schön gsi chli binenang ds hocke und gmüetlech es Bierli ds trinke.

Fougendi Spiler si mit ihrere guete Leistig uf ds Siegerpodest cho:

1. Beutler Dominic

2. Schüpbach Jan

3. Kiener Jarno

Am 28. März si mir zäme ds Kirchberg ga bowle. Mir si es paari gsi, drum hei mir grad drü Bahne für üs gha. Näbemne Bierli hei mir no öppis Chlises gässe u drmit e schöne Abe zäme verbracht.

Geschter, am 3. März hei mir üs ds Burgdorf troffe u hei zäme öppis Nöis usprobiert. Es het sech usegstöut, dass Curling spile nid eso eifach isch, wie me villech dänkt. Am Ahfang isches no chli e gwagligi Sach gsi, aber dank dr guete Ihfüerig, si mir immer wie besser worde. D Motivation isch immer wie meh gstige wo mir es chlises Turnierli düregfüehrt hei. Es het wie immer gfägt, u mir hei e gueti Zyt zäme gha.

Hüt am Abe hei mir üsi Houptversammlig, wie jedes Jahr im Restaurant zur Sagi im Ringebach gha.

Mir hei ou das Jahr viu nöii Gsichter (zum teu ou scho bekannti) dörfe ihr Landjugi begrüesse. Leider hets ou uf das Jahr äs paar Usträttä gäh. Witer hetsech üse Vorstand chli veränderet, üsi Presidäntin d Rahel Jost het ihres Amt abgäh ah üse bishärig Vizepresi am Patrick Gerber. Ah dere Steu wete mir ar Rahel nomau äs riisä Merci säge für ihre super Job wosi au die Jahr gmacht het. Nöii Vizepresidäntin und drmit ou gad nöi im Vorstand isch d'Anina Grossebacher gwäuht worde. Sie wird ou nöi üsi Social Media-Kanäle übernäh, bzw. Instagram, Facebook und diä Website füehre, was bis ize d'Nicole Wyss gmacht het. Usserdäm het üsi Kassierin d'Sabrina Gerber ihre Job ah d'Nina Meister abgäh. Ou ar Sabrina wette mir für ihri wichtigi Arbeit wosi aus Kassierin gleistet het merci säge, es isch nid immer äh eifache Job gsi, abr sie het das immer Super gmacht!

So fröie mir üüs ufenes witrs erläbnisriichs Jahr mit dr Landjugi mit au dene nöie Lüt im Vorstand und im Verein säuber.

Am Fritigmorge hei mir m 7i d outos gfüut u si mit über 10 Persone it Länk gfahre. Bi troumwätter simer du dr ganz tag flissig am skiine gsi u hei duss ir cheuti z après-skii gnosse (sowie di chaute Pommes, da mäh ja ar sunne het wöue si u nid ir wärmi). Di autbekannte chartespieli wi z' 31erle & "lügä" hei nid dörfe fähle.

Nachemnä feine z nacht im Kuspo simer du los gloffe i z' tippi füre. Dert isch du für üser früschlinge dr zytpunkt cho für d ufnahmeprüefig: Dr tippisirup z trinke! ...Äs heis auso aui gschafft... meh oder minger...

Im Hirsche isch z feste u z tanze witergange u när isch me de nadisnah hei.

Am samsti morge si nid aui glich fest motiviert gsi...einzelni Morgemuffle hei meh müeh gha mit de Morgemönsche abr nachem zmorge isch du d stimmig wieder harmonisch gsi.

Z wätter het mitgspiut u so heimer o am zwöite tag herrlächs Skiwätter gha u si fliisig ga kilometer sammle. Üsi Gruppe het sech i derä zyt verdopplet u so si natürlech no meh spannendi gspräch u erläbnis z stang cho.

Währendem verlengerete 11i-schuss heimer du mitem Odi mitgfieberet u gfestet woner sone übermönschlechi leistig het häre gleit...gli druf simer när abr am düüme drücke gsi füre Kilde..

Ir Ötzibar heimer du di letschte Sunnestrahle gnosse u si ohni unfäu (bis uf einzelni chlini stürz) wieder richtig Kuspo gange.

Ou ah däm obe, mit über 20 nase, heimer z tippi grockt u zämä äh riese chiubi gha! Es isch eh geburi gfiiret worde vo eim wo nid het geburi gha, angeri hei sech aus tänzer ar stange bewiese u wiederum angeri hei glück gha sisi im richtige zimmer glandet am schluss.

Am sundi vormittag simer du wieder richtig hei zue...di wo no hei möge hei du när ir WG chöne cho zueche hocke u es täuer Spaghetti gniesse.

Das Jahr hei mir leider ke Steizyt-Party chönne verahstaute. Wäg däm het üses OK-Steizytparty churzerhand öppis angers organisiert, und zwar die ersti Glüehwii-Wanderig z Heimsiwiu! Mir hei hüt rund 100 Lüt dörfe begrüsse, trotz däm verrägnetet Namitag. Dr Abe hei mir de när mit öich zämä im warme Saal im Landgasthof Löie z Heimiswiu dörfe lah usklingä.

Merci für öiie Bsuech!

Das Jahr si mir z erste Mau ah Santa-Run z Bärn -aber sichr nid z'letzt mau! Äs paari vo üs hei sech tortz dr cheuti usegwagt. Warm phaute hei si sech nid umbedingt mit secklä... ;)

Hüt simmer wie au Jahr ads Regio-Volleyturnier bir Landjugi Worblental. Ou das Jahr si mir, wie letzts Jahr scho, mit zwöi Teams gstartet. Leider hets trotz grossem Ihsatz nicht glängt dr 1. Platz vode letzte 2 Jahr z verteidigä und üsi Teams si ufm 6te & 8te Platz glanded.

Merci ad Landjugi Worblental für z organisierä!

Dä Sunntig si mir gah Lasertag spile z Muri. Fürnes Foti vom Lasertag hez leidr nid glängt, wiu mir si när no witer gah Bowle u Billard spilä. Isch aber äuä bessr so gsi, wiu mir hei nämlech aues gäh bim lasertag u si veiechli verschwitz gsi...isch aber äh sehr lustigi Rundi gsi

Später am Nami hei mir de dä Tag gmüetlech bim Burgerässä im Hans im Glück lah usklingä. 

Mir hei üs hüt scho früeh am Morge troffe, u si när zämä nach Ersige gfahre für mit dr Landjugi Ungeri Emme ihres 75 Jahr Jubiläum z fiire und am Seilizieh-Turnier mitzmache. Üses Team vo sächs Lüt isch währendem morge verdopplet worde, us däm grund hei mir du dr spontan gad mit zwöi teams chönne starte.
Füre erst platz hets leider ou das Jahr trotz 2 Teams nid ganz glängt, drfür simer aber zwöit u dritt worde.
Z Wätter het ou nid schlächt mitgspiut, s het zum Glück ersch nachem Seilizieh ahfah rägne.

Nachem sportlechä Teu hez no öppis zur sterchig gäh, u was für eini: Äs het diverses Fleisch u Gmües gäh wome sech drmit säuber het chönne Spiessli zämä steue u när so gad ufe grill het chönne due. Drzue es mega feins Salatbuffet u gnue z trinke! Nach dr Priisverleiig hez usserdem när ouno Dessert gäh.

Merci viu mau Landjugend Untere Emme  , und uf witeri 75 Johr!

Hüt ah döm schöne Samstignamitag simmer zämä gah Aareböötlä.

Z'Wasser isch für di eintä no chli z'chaut gsi u für diä angerä gad äh schöni erfrüüschig.

Nach äm Böötlä sii äs paari no fein gah Ässä mitennag u hei dr Abe mit Minigöiflä lah usklingä.

Hüt Abe isches sowit gsi: Äs witers Mau hei mir öich ihgalde für zu üs cho Spaghetti z ässä id Turnhalle Heimiswil. Wie jedes Jahr hei mir näb üsne säuber gmachte Sauce ou säubergmachti Turte dörfe ahbietä. Ihr Bar hei mir speter mit öich zämä dä super Abe lah usklinge und möchte öich nomau Merci säge für z verbi cho!

Hüt am Abe si aui wo letzt Jahr im Juli nach Irland si id Ferie mitcho, zämä gah Ässä. Bi äs paar "Ginsens" und ämne feine z'Nacht imne Irisch Pup hei mir zämä üsi Ferie lah Revue passiere.

Äs grosses Danke nomau ad Sarah und ad Laura für z ganze organisiere vode Ferie u dere coole Idee mit däm Rückblick-Abe!

Hüt am Abe hei mir ihr Zivilschutzahlag z Heimiswiu üses Häuferässä vor Steizitparty gha. Äs het wie au Jahr Fondue-Chinoise gäh und feini Dessert.

Hüt simmr am Abe bi dr Landjugi Worblental ihglade gsi zumne Chinoabe. Drzue hets Popcorn und Pizza gäh!

Äs isch extrem gmüetläch gsi u mir möchte üs nomau härzläch bedanke für dä suppr toll Abä!

Hüt am Abe hei mir üsi Houptversammlig gha im Rest. zur Sagi im Ringebach. Mir hei vili nöii (zum teu bekannti) Gsichter früsch ihr Landjugi dörfe begrüesse, leider si uf das Jahr abr ou äs paari Usträttä.

Mir fröie üs ufenes witrs erläbnisriichs Jahr mit dr Landjugi.

Ou mir hei üses Vereinsläbä im 2023 nach de Festtäg widr ufgno, und si aus erst gad mau is aujährlechä Skiweekend ar Länk. Wie au Jahr ischs super gsi!

44 Ching heisi das Jahr zum strahle bracht, üsi Chlöiis, Schmutzli's und Eseli's!

Merci viu mau für öiie Ihsatz & äs grosses danke ou ah Aui wo schüsch ufene Art zum glinge vo däm Tag hei biitreit!

Ah däm Wucheändi isch dr Wiehnachtsmärit z Heimiswiu ufm Programm gstange.

Mir hei das Jahr ou wiedr dörfe drbi sii und hei ih üsem Hüttli wiedr Ghackets u Hörndli verchouft. Usserdem hets äh feine Landjugidrink gäh zum sech ufwerme, natürlech mit odr ohni Schuss.

Mercii ah aui Landjügeler wo sii cho häufä, sig's zum Vorbereite, ihr Chuchi, im Hüttli oder am Schluss zum Ufrume. U natürlech Merci ah Aui wo si verbi cho!

Am Nami simmr uf Rheinfelden gah d'Fäudschlössli Brauerei besichtigä. Nach ärä länge aber spannende Füehrig hetz de no chli Bier gäh, u mir hei üs düür verschidnegi Biersortä chönne dürä probiärä.

Äs grosses Merci ah üse Chauffeur, wo üs ahschliessend no het ih Usgang ad Vougasparty z Kirchdorf gfahre.

Alle Jahre wieder...

...simmr as Oktoberfest Süri gah luege ob ds Bier geng no guet isch. Mir sii wie immer mitemne Car härä u zrügg chauffiert worde und hei äh super Abe gha.

Fazit: Z'Bier schmöckt üüs immr no :)

Aus ESAF-Vorbereitig hei sech hüt es paari vo üs ihs Sägemäuh gwagt, im Schwingchäuer. S isch äh lustige Abe gsi!

Üsi aujährleche Landjugiferie hei üs ih däm Jahr äh Wuche uf Irland gfüehrt. Am Mäntigabe isches mitm Flugi vor Swiss z' Züri losgange und nach 1.5 Stung simmr scho z Dublin wieder glandet. Am nächste Tag simmr nachm feine z'Morge gah ahluege, wisi dert obe Bier braue. U de nid öppe irgend äs Bier sondern ds Guinsens, pardon Guinness natürlech! Am Mittwuch simmr Ribi's Lüchttrum gah suche am Strand, wo mir de nach 15 min (Bösi Zunge behoubte es si meh aus 1.5 Stung gsi) ou erfougrich gfunge hei. Wieder zrugg ihr Stadt simmr de ih es paar vo dene duzend Pub's wos z Dublin git gah ihhcherä. Am speterä Abe simmr mitm Zug vo Dublin nach Galway gfahre. Am Donnstig isch äh lengeri Busfahrt ahgseit gsi zu de Cliffs of Moher. Uf dr länge Fahrt isch üs aber nid  längwilig worde, dr Chauffeur het geng wieder öppis gwüsst z'verzeue u sech nume einisch verfahre wiuer sech het ufs rede und nid ufs fahre konzentriert. Am Abe hez du de när eine vode lenger Usgäng gäh vo dene Ferie, säge dueni drzue nid viu - wär ah däm Abe drby isch gsi hets ömu guet gha. Am Fritigmorge wär eigetlech äh lengeri Velotour planet gsi, leider ischis usgfaue, isch aber äuä ou besser gsi für's Mägli vo teunä Landjügeler. Stattdessä hez när äh entspannte Tag gäh am Strand oder für paari äh glungnegi Shoppingtour. Am Abe simmr du de wieder mitm Zug zrugg uf Dublin. Diä ihgfleischtä Partygänger ungr üs si ih Usgang, und diä Angere hei es paar Stündli schlaf gfunge im Hotel, bis es de am Samstigmorge früeh richtig Dublin Airport gange isch. Preicht hei mirs übrigens super mitm Wätter, zwar ab und zue chli bewölkt, aber immr schön warm - grägnet het's nume wommr si heigfloge.

Äs grosses Merci ah d'Laura und d'Sarah wo  diä Ferie planet hei, äs het gfäägt!

Hüt hei mis üs ih üsem Vereinslokau troffe zum zämä z'Grille und dr Abe z'lah usklingä. S isch mau wieder eh super Abe gsi mit viune intressante Gspräch und dr einte & angere lustige Situatuion.

Hüt si drü Landjügeler mit üserä Presidäntin üsi Landjugi ar Regioversammlig vor Region West gah verträtä.

Jedi Landjugigruppe isch ihre Regionalgruppe - bi üs isch das d'Region West. Diä Regionalgruppenä widerum si ar Schwizerischä Landjugendvereinigung (SLJV) ungersteut. Ingesammt gits 5 Regione mit zämäzeut 50 Landjugende u insgesammt ca. 2900 Mitglieder. (Stand 27.4.2022)

Z Biud zeigt aui Landjugende ihr Region West:

Hüt simmer id Roue vo Detektive gschlüpft wommr ih Adventureroom z Solothurn si gange. Leider hei üs am Schluss aber es paar Minute gfäut.

Hüt am Vormittag hei säch äs paar wenigi vo üs sportläch Betätiget und säch ufs Iisch gwagt um dr Sieg z hole im Hockeymatch gägä TV Oberburg. Das Jahr hez leider nid (ganz) glängt, 0:15 isch ds Schlussresultat gsi. Mir danke üsem faire Gägner für z Spiu u gratuliäre zum Sieg!

Hüt am Abe hei mir zämä Wiehnachte gfiiret. Äs het äs feins Raclette gäh mit Tischgrill und äs Glas Wiiswii drzue. S' isch mau wieder äh gmüetlechä Abe gsi mit vile intressante und lustige Gspräch.

Hüt hei es paari vo üsere Landjugi ahm Regio-Volleyturnier tielgno wo vor Landjugend Worblenthal organisiert isch worde. Das Jahr hei mir es super-mega-gutes Team zämäbracht! Gad ufe 1. Platz hei mir's gschafft und auii Spiu, bis uf eis ihr Vorrundi, gwunne!

Gester isch üsi Landjugi iglade gsi am Hochzit vo üsere ehemalige Presidäntin - üsi Alena het ihre Stefan ghürate!
Für öii gmeinsami Zuekunft wünsche mir öich nume z' Beste!

Ou üsi Landjugi het sit langem widr öppis zämä ungerno!
Gester si mir gah Minigöifle u heis gnosse mau widr mitnang es bierli z näh u äh gueti zit zämä z ha.

Am 1. Apriu isch ou üsi Landjugi am Ostermändiger verträtte gsi. Mit drü Teams hei mir düre Tag sächs Poste dörfe absolviere. Die si immer usemne Theorie- und Praxisteil bestange. Mir hei e schöne Tag zäme erläbt und immer öppis ds lache gha.

Am 16. März si mir zäme ga z‘Nacht ässe. Im Landgasthof Löie ds Heimiswiu hets für aui feins Rahmschnitzu gäh. Ds Programm isch när no witer gange und het üs uf Hasli, ad Holiday-Night vor Landjugend Rüegsbach gfüehrt.

Hüt heisech 14 landjügeler aus Hockeyler versuecht und versuecht gägä TV Oberburg im aujährleche Match z gwinne.

Wo di einte afang z erste Bierli gno hei, si die angere scho nachem ahlege vor Usrüstig us dr puste gsi. Die erste Meter ufem Isch si no chli gwagelig gsi, aber nachem ihwärme u ihschiesse si du di meiste sicher gsi. D'Motivation isch gstige womer hei gseh das üsi Fankurve gäng wi grösser isch worde u si üs tatchräftig ungerstützt hei. Die einte si ga z Wasser uffüue, die angere hei üs z tööri uftah oder motivierendi Wort zugredt. Mercii für öii Ungerstüzig!

D Spieler hei aues gä u si ordenlech is Schwitze cho u glich hets leider ou das Jahr nid füre Sieg glängt. Z eintä oder z angere Gou heimer aber doch ou erziut u das, das heimer när ir Garderobe no chli gfiiret!

Es het wie au jahr gfägt u mir danke am TV Oberburg für dä fair Match!

Dä Mittwuchabä hei mir mau öppis nöis usprobiert.

D'Anita het aui Intressiert mit ih nä Yogalektion gno. Äs isch für vili spannend gsi mau öppis nöis z usprobierä und sech ungr dr ahleitig vor Yogaleiterin mit dr eigete Atmig und m' Körper bewusst usenang z setze. Äs het auso aune gfaue u di meiste heisech sehr entspannt gfüeut nah denä 1,5 stung.

Faus ou du intressiert ah Yoga bisch, oder mau öppis nöis hesch wöue usprobiere, de bsuech doch d'Website vom Yogaverein Heimiswiu ( https://yogaheimiswil.ch/ ) Dert fingsch du meh Infos u chasch di ungerangerem fürne Schnupperlektion ahmäude.

Di chlini Yoga-Gruppe würd sech sehr übr nöii Gsichter freue u heisst Intressierti gärn wiukomme.

Wie jedes Jahr hei mir ou hüt wieder zämä Wiehnachte gfiiret. Das Jahr isches zwar nume es chlises Trüppli gsi, wo isch zämä cho. Wäg däm heisis aber nid weniger lustig gha zämä u hei nachemne feine Raclette no Gschänkli ustuuschet.

Ih däm Sinn wünsche mir aune schöni Wiehnachte!

Ou das Jahr hei üsi Chlöis, Schmutzlis u Eselis wieder viune Ching äs glänze id Ouge zouberät. Viele Dank ah Aui wo öppis gspändet hei & ähs grosses MERCI ah aui Landjügeler wo ah dere tolle Sach beteiliget si gsii.

Das Wucheändi isch vom Friti bis am Sunntig dr Wiehnachtsmärit z Heimiswiu gsi. Wie scho ide letzte Jahr si mir ou wiedr drby gsi, und hei üses autbekannte Menu "Hörndli mit Ghackets" ahbote. Merci für öiie zauhriche Bsuech und aune häufende Landjügeler!

Hüt am Abe hei mir üs mit ämne Car ufe Wäg gmacht ad Mutter aller Partys, as Oktoberfest Süri! Das Fest isch äh jährleche Programmpunkt bi üserä Landjugi u ou das Jahr isches wider einisch legendär gsi!

Äs chlises Grüppli vo üsne Landjügeler isch uf Dänemark id Ferie gfloge.

Mir hei viu verschidnigs erläbt ih däm tolle Land! Mir si gah Windsurfe, hei äh intressanti Füehrig dörfe bsuechä vomne (für üsi Verhäutnis) grosse Burehof,  si Dörfli gah erkunde, si imne Wasserpark gsi u hei ou mau widr chli dörfe Ching si im Legoland.

Gässä hei mir jede Abe sehr guet, u ou ds dänische Bier het üs gschmökt. 

Am Abe si mir mit äs paar Landjügeler vode umligändä Landjugis gah (Plousch-)Hornusse.

D' Profis hei ungerenang äs "Grüppälä" gmacht, und d' Neulingä hei äh chlini Ihfüehrig becho u när grad mau einisch dörfe probierä dä Nouss hingerä z'bänglä. 

Dr eint odr dr anger hetsech du de när no uf sirä schwecherä Sitä probiert - ds het fürä eint odr anger Lacher gsorget! 

Nachem Hornusse si für z' Grillierä nomau äs paari drzue gstosse u mir hei bimne gmüetlechä Fürrli dä cool Abe lah usklingä.

Am Morge si mir ih üses zwöitägigä Wander-Weekend gstartet.

Mit viu gjammer, wiu nid aui drmit grächnet hei dases uf dr Rigi sonä Bärgwanderig git, hei mirs erfougrich zur Alpwirtschaft gschafft. Dr Satz "...iz geits scho wiedr obsi!" isch sehr viu gfaue, abr dr Richi het jedi u jedä chönne motivierä mit sirä Lieblingsussag: "Iz geits no äh Viertustung". (Diä Landjügelär wo ihdä Landjugiferiä mit uf Irland sii cho, kenne ds viellech vo irgendwo häär...)

Houzghacket, fein gässä, gnue trunkä u gah bade simmr, ou weme nid gnau weis was ih däm Wasser isch gsi...

Nach äm einte oder angerä Misstritt und ämne chline Usfluug drübr uus, si üsi Wandervögu mit Muskukater und äs paar Blatterä wiedr daheim ah cho u si am Abe no mit üsnä Hornusser ihre Ufstiig gah fiirä.

Hüt am Abe simmr mitme chline Trüppli ad Bea uf Bern. Viu Stäng hei zwar nümm offe gha, für no chli gah z'schnöiggä, abr d'Bier-Stäng hei üüs eigetlech ou gad glängt. ;)

Proooscht, ufene lustige Abe!

Ou üsi Landjugi isch das Jahr wieder am Ostermäntiger drbi gsi! Mit zwöi Teams hei mir dä Postelouf ih Ahgriff gno, und trotz vouem Ihsatz hez leider nid bis füre ufs Podest glängt.

Aber immerhin het eiis vo üsnä Team bewisä, das mir guet im schezze sii!

Ah derä Steu nomau äs grosses Merci ad Landjugi Oenztal für d'Organisation vo däm super Tag!

Hüt Abe isch üsi interi HotPot-Party übr d' Bühni gange.

Dank flissigä Häufer/-inne het am Fritiabe aues chönne ufgsteut wärde u z' Wasser bis am hüt Abä chönne erwermt wärde. Öppr hez bim einte Chübu chli guet gmeint mit Ihfüürä u dä isch du de hüt gad chli z' Hot gsi für d' Badegescht.

Trotz am chaute Wätter isch äs äh super Abe gsi, äs het zuesätzlech äh gheizte Ruum gha zum Ässä u ou dr Match het mäh nid vrpasst.

Äs grosses Mercii ah di ganzi Familie Meister, füre Platz, fürs Füürä u Organisierä!

Hüt am Abe isch äs grosses Trüppli vo üüs uf Kirchberg gah bowle. Wiu mir so viu gsi si, hei mir gad vier Bahne für üüs allei gha. Bimne Bierli und amüsante Gspräch, hei mir äh lustige Abe dörfe verbringe.

Hüt am Nami hei mir z Hasli Ice-Hockey gspiut gägä üse Lieblingsgägner m TV Oberburg. Äs isch wie au Jahr äs hert umkämpfts, aber glich fairs Spiu gsi. Am Schluss hei üsi Landjugi-Hockey-Cracks ds Spiu aber de glich mit 9:3 chönne für sich entscheide. 

Merci am TV Oberburg, äs isch geng äh fröid!

Am Abe hei mir zämä Wiehnachte gfiiret im Spycher. Äs het äs feins Raclette gäh u Glüehwii. Mir hei viu glachet, gsunge und päckli ustuuscht - äs isch äh schöne Abe gsi!

Mir wünsche öich aune frohi Festtäg! Gniessit Zit mit öine Lüüt, u blibit aui Gsung!

Äs isch wiedr mau so wit gsi: Nach 2-jähriger Corona-Pouse hei mir äntlech wieder mau dörfe üsi Steizytparty dörfe fiirä. Äs isch äh voue Erfoug gsi, und dir heit üs mit öire zaurichä Erschinig überrascht. Schön sit dir aui cho!

Hüt het z' aujährlechä Regio-Volleyturnier stattgfunge. Das Jahr simmr mau wiedr mit zwöi Teams uf Worb, und hei erfougrich üse erst Platz vo letzt Jahr verteidigt. Äs isch äh supper Nami gsi, merci ar Landjugi Worblental für z organisierä!

Hüt si d Gourmets unger üs gah Wiud ässä im Landgasthof zur Linge z'Wynigä. Sehr fein gsi!

Hüt simmr z Ruswil gah Indoor-Minigöifle. Z spezieue dran isch, ds dr ganz Ruum nume mit Schwarzliecht belüchtet wird. S'isch eh mega cooli Sach gsi, und nume zum witrempfählä!

Am Samstigmorge hetsech es Trüppli Landjügeler fertig gmacht um gah z' wanderä. Z' Zieu isch d Blümlisalp SAC Hütte gsi. Dr Ufstieg isch ahsträngend u läng gsi - hezesch aber glohnt! Obe acho hei üsi Wanderbegeisterte äh wunderschöni Ussicht uf d Umgäbig gha. Z Wätter hät nid schöner chönne sii! Äh beihdruckende Sunneuf-&ungergang heisi dörfe erläbä, bis es de när wieder hei zu isch gange.

Äs chlises Trüppli vo üs isch hüt z'Sörebärg gah Pfileboge schiässä. Es het mega Spass gmacht und nach par Üebigs-Pfile simmr aui parat gsi für alleini gah z "jagä". Ufemne Parcours mit ca. 18 verschindige, läbensgrosse Tier hetme sis Können chönnä bewisä. Für dä wo am beste preicht het, hez äs Abzeiche gäh, und für diä nid ganz Beste äs Trostprisli.

Ou mir hei nach dr Coronapouse äntlech wieder mau dörfe äh grössere Ahlass uf d' Beii steue. Üse Spaghetti-Plousch isch äh riiesä Erfoug gsii! Spaghetti hei mir gnue gha u ou d' Turte hei glängt für aui wo no es Dessert hei wöue. Ahschliessend isches de ihr Bar scho chli äng worde, wiu so viu vo öich no äh Schlummertrunk hei wöue näh.

Mir si überwäutiget drvo, wie viu ds erschinä sii u üs drmit ungerstützt hei! D' Landjügeler vo Heimsiwu dankä öich aune härzlech für öie Bsuech u fröiesech scho iz uf nöchst Jahr!

Ou ih däm Jahr simmr mit vier Teams am Ostermändiger gstartet wo vor Landjugi Oenztal isch organsiiert worde. Leider hez wie scho ide vordere Jahr nid ganz fürne Podestplatz glängt. Mir fröienis aber scho iz wieder uf nächst Jahr!

Hüt am Abe het üsi HotPot-Party stattgfunge. Dank m Ihsatz vo üsem Gastgäber hei mir im schönä, warme Wasser ar chaute Biisä chönnä trotzä u hei äh super Abe zämä verbracht.

Am Fritig isches losgange mit üsem Ski-Weekend ar Länk!

Wie au Jahr si üsi Ski- und Snowboardbegeisterte Landjügeler uf' abr ou näb dr Piste guet ungerwegs gsi. Bi aueribestem Wätter hei mir das legendäre Weekend wieder einische chönne gniessä!

Hüt hei mir ih üsem Vereinslokau Pizza gmacht. Äs si so viu Landjügeler cho, wie scho lang nümm und es het richtig fröit gmacht! 

Dr Abe hei mir mit Schnöizle u Jasse lah usklinge und ds einte oder angere guete Gspräch gführt. S isch wieder mau äh richtig guete Abe gsi! 

Ah dere Steu wetti es grosses Merci ah üse Vize-Presi richte, MERCI VIU MAU Pädu für die diä feine Pizzas, du bisch dr bescht Pizzaiolo!

Am Nami hei mir üs troffe u si zämä uf Lyss gah Kart fahre.

Letzt Fritig isch äs Grüppli vo üs ahträtte bim aujährleche Seilizieh z Ersige.

Siiieg!!! Hüt hei sech es paar sportlechii Landjügeler ufs Isch gwagt um dr aujährlech Hockeymatch gägä TV Oberburg z spile, u hei de grad mit 4:0 gwunne!